2Cor 8 | ASO | STEP | Neze zuhokizo, ingine Izesu' evenele zuho mulise Makedonia misubou' mini'mi monavela O'moso'mi nasahili've ne'mo gono do gihile've do soto' ine' nemu' naza gililizave losa nene lo-lengemelouve:

2 Corinthians 8

Izesu' Evenele Zudaia Misubouko Minanguti' Goho' Gahali' nGemelone Li Makedonia Aleve Moni Inele Igi Di Nubo Adi'mine Igi Linginesi Ma Di Nubo Igi Milalo Lo Paulo' Lo-ngimine' Gamazi

1 Neze zuhokizo, ingine Izesu' evenele zuho mulise Makedonia misubou' mini'mi monavela O'moso'mi nasahili've ne'mo gono do gihile've do soto' ine' nemu' naza gililizave losa nene lo-lengemelouve: 2 Ingine nene geni inite' nabali'mi lulou' minangukisi ido' angise'ine nene goho' gahali' gehepeve minangumukisi nene gili huli monokumu' atoli'mine igi ngolize izi minadi'mo moni nene naba inele igi di nubo ani' ve. 3 Ido' ingine a'mine moni di nubo ani' nene ingine hulilizado' o minine' moni nene hulani'za a'mine votigile nesi nene ivile' ivosa vauve ili masi hulani' nemu' naza gele lamine' ogosa nolo-lingimuve. Ingine engi' lu'nido' di mili 4 geli geli igi amuzonga ti' li li-limani' ve: Agae, lingine gili limikevo a'mine O'moso'mi evenele hizi ele' i-ngidilisa moni di nubo ilizangu' lazasi nene ma hulolosune. 5 Ee, ingine ne'mine ilisave lo gilunido' avoba asi engi' nene gomu' Guvelesi ve lehizi-mikii alinge' nene lelitasi gelekele' i-lidani' ve. 6 Ne'mine ani' nenako ido' Tito' ne'mo nene gana' api' ogo lutine do ote-lengedavo lingine Izesu' evenele nasahili' i-ngidilisa a'mine gono nene api' ani' nenako nemu' nene Tito' aza a'mine gonolo' vo gizebo ivo di pililizave lo amuzonga lo-dekune. 7 Lengita mono' monovo muki' nene vauve elo neive. A'mine ado' lingine gili ele'vole' igi mini mono' gamazi di lamine' igi li soto' igi mini monokumu' gili hehe li mini a'minemu' gilingili igi mini ido' laza lutine do ote-lengedekunivo lutine leli' limi minaa' naani' ne neive. Nemu' nene a'mine nasahili' o-ngedaa' gono nesi nene amuzo mili dalizado' o neive. 8 Ido' ne'mine noluvoni' nene naza lo huko mo ne'mine ilizave losa nolo-lingiduvoba asi evene' malite a'mine gonomu' gilingili igi minani' monovo'ine nene lo-lengemekuvo ne'mo nene do ote-lengedavo lingine lutine ngimaa' naani' nene mo abeleni isa'mii mo ne'mine iga' nani' nene soto' ilive losa nene ne'mine noluve. 9 Ido' ne'mine ilizado' o neive noluvoni' nene lingine Guvetesi ve Izesu' Kilisito' nasahili' o-lede neine' monovo've nene gili nizanako a'mido' e'metilizado' o neive losa ne'mine nene noluve. Aza nene inite' mata' muki' do minine'za a'mine do a'manapa amo naza goho' gahali' lolo' okuvo ne'mo nene lingine inite' mata' muki' di minilizave losa lengikumu' nene goho' gahali' ne'mine lolo' ine' ve. 10 Ido' a'mine gamazi memu' nene naza ga'neu' giluvoni' nene ma lo-lengemelove: Ma kilisimasi mau' nene lingine ne'mine gono dalone li mo gana' api' igi dani' ma nene mo lutine laminetoti' dani' ma neive. Nemu' nene a'mine gonotine nene lingine gana' amuzo mili dalisa gili dani' ma'mine igi lengi' initetine'mi votigilelo' di milisa lite' li di osu' lilizani' nene mo lamine' oloseive. 12 Ido' lengi' initetine'mi votigilelo' di milisa ilisave noluvoni' nene nemu' noluve. Ve malite lu'ine otavosa inite' ma lehizi-ngidilisa gilani' noline' nene O'moso'mo gelavo ingine inite' di minani' votigilelo' lehizi-ngidani' nene mo lamine' oga' neive. Aza nene inite' masi lehizi-ngidilizanako lo gelo evene' ingine ma damani' initekumu' nene ma gelo losa'mive. 13 Ne'mine noluvoni' nene evene' ma hize ele' igi di ngu' izikevo lengita geni ilive losa nomive. Asi lisihe' lisihe' igivo' minilizave losa nene noluve. 14 Ido' idise meve lengi' initetine vai' lo neine' ne'mo nene inginela nomine' inite' nene hize ele' o-ngedeleseive. Ne'mine oloseinako ingine gamene vilido' nene ingine inite'ine vai' lo minelinguti' nene linginela nomiline' inite' nene hize ele' o-lengedeleseive. Ne'mine ogavosa lingine mukito' nene lisihe' lisihe' igivo' minilisave. 15 A'mine nemu' nene mono' godolou' ti' li gizi nizado' vo daloseive:

Noso' nite' vai' di nubo ave nete nene noso' nite'ine nene lumosi ma milisa'mave.
Ido' noso' nite' ngomovo' di nubo ave nete nene noso' nite'ine osu' lavo noso' nite'ine vise' ma isa'mave.

Di Nubo Ani' Moni Maka' Do Vo nGemelonive Titokisi Ido' Mono' Aleveuti' Di Oti-ngidave Sitakisi Lengita nGimiselekunivo Igi Hetelilisave Lo Paulo' Line' Gamazi

16 O'moso'mo Tito' lulo do ote-davo laza hize ele' o-lengedelesa gilingili ogo none' ne'mino Tito' nesi nene gilingili ogo neivo nemu' O'moso isaa' neve nolo-dune. 17 Ee, laza lengita vilive lokunivo gele limine'za asi've mo lengita volosa gilingili ogo gele neido' nene luune' ve. 18 Ido' Titokisi vilive lo leze zuho masi noimiselunive nene mono' mulise muki' mini'mi monani' nete nene mono' gamazi lamine' lo soto' soto' oga' neingumu' nene opo'ni li di naba i-daa' nave ne neive. 19 Ido' neevo' nomive. Ado' mono' mulise ato ato' vai' nete nene a'mine nasahili' i-ngidi moni di nubo ani' do vo ngemeloningu' nene ezesi a'mine gonolo' hize ele' ogo lelikisi maka' vilive li di oti-dani' ve. A'mine gono dalone' nene a'mine gono dokunivo a'midoti' nene evenelite Guvelesi ve di naba i-dilizave losasi ido' leli' lute ne'mo goho' gahali' hize ele' o-ngedaakumu' ote neine' nene do soto' ilive losasi nene dalosune. 20 Ido' lengita noimiselune' nene a'mine inele igi hulani' moni nabamu' gono daloningumu' nene evene' hamolitesi di gopo ikeve li lemenga li lelemikelizave losa a'mine aka hize tileloningumu' nene noimiselune. 21 Nene nanitekumu' ve. Laza ne'mino monovo lamine' oloningumu' nene O'moso'movo' gelelivoba asi mo evenekisi nene gililisave losa nene ne'mino lovo gizo do lisihe' okune. 22 Ido' a'mine ve sitakisi nene leze zuho gohi masi noimiselune. Gamene muki' a'mine ve nene gono ato ato' doka' doka' ingu' monovo've nene mo do ningekune. Aza mono' gonou' nene gilingili ogo minaa' neive. Ido' idise mene lengikumu' nene monoku' ele'vole' ilisave lo gele mu'musi' gehepeve o neine' nenako nemu' nene a'mine gono nene dalosa mo gilingili ogo amuzo goloso nomolave. 23 Ido' Tito' neve nene nezesi bizo gono makato' daa' usive nene neive. Ido' leze zuho sita' ingine nene mono' mulise ato ato' nizado' nene di medeli-ngidi a'mine gonolo' ngimiselave sita' nene Kilisito'ni di naba i-dilisido' i nizasive. 24 Nemu' nene ingine nivavo ma lengi' lutine ngimaa' monovotine ne'mi gihile'vesi ido' laza lengi' do naba o-lengedo lo-ngimune' gamazi ne'mi gihile'vesi nene ningilizaze. nGelebizilo. Ee, mono' mulise ato atoku' aleve nete a'mine monovotinemu' nene ningi gililizangisi ngelebizilo.